हाम्रो बारेमा

परिचय

पल्टु विषहरा थारू (चौधरान) वंशावली के परिचय

(वोद्यमाइझ, शिवराम चौ०+ हेवकी, देवकी, हृदय महेश)

आदरणिय सम्पूर्ण वंशावली परिवार के सव गोरे मे हार्दिक स-धन्यवाद के साथ सर्वप्रथम "पल्टु विषहरा वंशावली" केन्द्रीय कार्य समिति के तरफ से गोर लागें चियै । आई "पल्टु विषहरा वंशावली" नमाकरण कथिले के लिये त ? वास्तानमे पूर्वज जानैबला व्यक्तित्व सवके खोज अनुसन्धान पहिचान के आधारमे पहिले वृजः पितामह श्री पल्टु परिहत गोष्टी द्वारा बुढुवा अग्रज सव कैहै छेले तर छलफल करत अगाडी पछाडी पहिचान के क्रममे परिहथ खानदान (चिचु परिहत) अलगे खानदान वंशावली भेलाके कारण से परिहत शब्द हट्याल गेलै । आव एल "विषहारा शब्द "वास्तुव मे येकरा साधारण बोली भाषामे विषहरिया शब्दावली से चिन्हल जाइछै त विषहैरिया कथी ?

धर्म परम्परा संस्कृत और पहिचान के आधार मे हमरौरके पूर्वज पुर्खा- सव धामी धम्पैन पुजा आजा और विशेष त जब ककरो नाग वा साँप धैर लेलकै त गहवरमे आइन के विष झारैवाला काम प्रख्यात रूप मे करै छेलै और जब सुक्खा रौदी हैछलै त नाग पंचमीमे (झाइल मिर्दङ्ग और भगैत के साथ) मोइह लग्या के पाइन बर्षा के बारेमे धामीया गहवरिया से वचन ल्याके सन्तुष्ट है छ्यल और जव कोशी, त्रियुगा, वलान, कमला मौहली लगायत यी नदी सबमे बाइर से ग्रसित है छ्याल त मोहइके वचन से कौवला पाती कैरके अलग या दोसर धार, ठाम काइम कराइ छ्याल त यि विविध शक्ति के प्रतिक रूप अन्तरगत धामी धम्पैन से चिन्हल और साँप के विषहरण के उदाहरणिय रूप विषहर नामाकरण भेलै ।

अन्त मे वंशावली नामाकरण श्री पल्टु विषहरा "वंशावली अन्तरगत बृज पितामह: "पल्टु विषहरा" के नाम से परिवर्तन करल गेल। यैसे पहिले प्रथम बैठक पडरियामे >बौध माइझ शिवराम चौधरी नाम प्रस्तावित भेल छेल लेकिन राम माइझ + वली माइझ दुइटा बेटा के अलग पक्ष पहिचान के कारण तरमे आइबके आठौं पिढी राम माइझ पक्षके "बोध माइझ शिवराम चौधरी" और बली माझ्झ पक्ष के "हेवकी, देवकी, ह्रदय और महेश पटवारी" आठौं पिंढी मे जोरलाके कारण वृहत छलफल के बाद पूर्वज पुर्खा सब श्री "पल्टु विषहारा" वंशावली (वोद्यमाइझ, शिवराम चौधरी + हेवकी, देवकी हृदय, महेश) नामाकरण केलक । धन्यवाद !

वंशावलि विकासक्रमके संक्षिप्त इतिहास 

सिरहा जिल्ला न.पा. लहान वड न.१५ शोभापुर गॅाउ से तिन जना पडरिया गॅाउ २०५५ साल वंशावलि खोज तला करनाइ कहिके बैठक भलै । तेकरे बदैलत २०५६ चैत ११/१२ या १३ गते सिरहाके पडरियामे वंशावलिके महासम्मेलनमे अपन वंशावलिके आदमी कोईयो हेऱ्याल भुतिय्याल छुटल-बरहल तर-उपर ,उलटि-पुलटि भेलहा गम्भिर समस्या सबके निराकणके लेल सबकोई एकठाम बैठके छलफल, विचारविमर्श तर्क-वितर्क लिखित तथा मौखित गोष्ठि प्रमाणके आधारमे सबके चितबूझ्दो तरिकासे सबके समस्याके समाधान भ्याल रहै । वंशावलिके नाम किटान करैले बहौत तर्क-वितर्क या छलफलकरलाकेवाद वंशावलिके नाम "बोधमाईझ शिवराम चौधरी " सर्वसम्मतसे पारित भेल रहै । तै दुवारे यी सम्मेलन वंशावलिके प्रथम ऐतिहासिक महासम्मेलन छेलै । क्षेत्रगत हिसाबसे कोनो क्षेत्रमे "बोधमाइझ शिवराम चौधरी " के नामसे प्रख्यात छै त कोनोक्षेत्रमे "हेवकि देवकि हृदय महेश " के नामसे प्रख्यात वा जानैछै । महज वंशावलिके दुनु अलग अलग छोरके आठम्वे पुस्ताके प्रख्यात व्यत्कि सब चियै । सम्मेलन सम्पन्न भेलाके बादमे विभिन्न तर्क-वितर्क या छलफल बौहौत दिनतक जारिये रहलौ । फलस्वरुप दोसर सम्मेलनके संघारमे आइवके केन्द्रि समितिके मिटिङ्ग बैठके विभिन्न तर्क-वितर्ककेसाथ वंशावलि नाम सहि ढंगसे उपयुत्क नै देखलजाइछै कैहके कमिटिके मिटिड्गमे वंशावलिके नयॅा नामके प्रस्ताव पास कैरके निर्णय ल्यासकने छेलै ।फलस्वरूप सुनसरि के धमौरामे मिति २०६२ चैत ४-५ गते राखलगेल वंशावलिके दोसर सम्मेलनमे वंशावलिके संशोधित नाम "पल्टु विषहरा थारू चौधरान "  पारित भ्याके अनुमोदन करलगेलै । योहो बेरका संशोधित नाम जन समुदायमे पुर्णरूपसे सुखद संतुष्टि दैले नै सकलकै । तैयोमे नवगठित समितिसब सकृयताके साथ २०६६ सालमे प्रथम संस्करणके वंशावलि किताब छप्याके घर-घरमे ज्याके वितरण कैनेछेलै ।

         विभिन्न तर्क-वितर्क  या पक्ष -विपक्षके हिसाबसे समय बितैतगेलै । तैयोभी यैहनड्गे वातावरणमे रहैके उदयपुरके तपेस्वरी बेल्हामे मिति २०६९ चैत १०-११ गते वंशावलिके तेसर सम्मेलन भि सम्पूर्ण संख्याके क्षेत्रगत आंसिक उपस्थितिमे सम्पन्न भेलै ।वादविवाद या मन-मोटावके  वावजुदभी छः वर्षके बादमे असन्तुष्ट पक्षके सकृयता /अगुवाइमे मिति २०७५ चैत १५-१६ गतेकेदिन सप्तरीके पोखैरीया बसानपटीमे बडि भव्यताके साथ वंशावलिके चारिम सम्मेलन सम्पन्न भेलरहै ।सम्मेलनके  मुख्य उदेश्य रहै - सैबप्रकारके मनमोटाव छोइरके एकतामे ऐक्यवद्धता लावनाइ अर्थात मेलमिलाप करनाई । यैबेरका उपस्थितिसे सकारात्मक समर्थन त भेलै लेकिन मनसे पुर्ण स्वीकृत नै देलकै अर्थात उदेश्यके पु्र्णता प्राप्त नै भेलै । तैयो अपेक्षाकृत यै बेरका वंशावलिके संशोधित नाम "पल्टु चौधरान" (बोधमाइझ ,शिवराम चौधरी , हेवकि,देवकि,हृदय,महेश ) पारित भेलै । नवगठित वर्तमान केन्द्रिमुल समिति वर्षदिनके भितरे २०७६ आसिनमे वंशावलिके नामसे प्रतिष्ठान के दर्ता कराइनेछै । प्रतिष्ठानके केन्द्रि कार्यलय सप्तरी महौलियामे रहलछै ।वंशावलि विकास लेल बहौत ऐजेण्डासब प्रस्तुत भेलरहै । जैमे सबसेबेसि सबकोइ उठानके विषय रहै "दोसर संसकरणके वंशावलि किताब प्रकासन करनाइ" यै कामके वास्ते सबसे पहिले करैवला काम डाटा संकलन  करनाइ छेलै । महज योह्या मुख्य काम बहुत धिमि गतिसे रहलै । यै समितिके समयावधि समाप्त भ्यागेलै । वंशावलिके पॅाचम सम्मेलन करैके समय भ्यगेलाके वजहसे किताब छपाइ के काम करैले नै सकलकै । फलतः तत्कालिन कार्यसमिति के सात वर्ष पुरा भ्यागेलाके वादमे मिति २०८३ साल बैशाख ११ गतेके दिन उदयपुर जिल्लाके वेलका  न.पा. -२ वेल्हामे वंशावलिके  पॅाचम सम्मेलन भव्यताके साथ सम्पन्न भ्यागेलछै ।

भवतु सब्ब मंगलम !