रौताभागी वंश वंशावली

रौताभागी वंशावली के पृष्ठभूमि

आई से लगभग ५०० वर्ष पूर्व हालके उदयपुर जिल्लाके उत्तरी भेगमे अवस्थित रौतापोखरीके अगल-बगलमे बसोवास करैबाला देवाई माईझके दुई सन्तान (विष्णी और किष्णी) रहै । जेठ विष्णी गुणी धामी, दिव्य पुरुष भेलाके ओजह से अगल-बगल के गाम-घरमे कोनो तरहक दु:ख, बिमारी भेलासे ओई ठामके लोक सब विष्णी माईझूके याद करैछलै । बोई ठाममे प्रख्यात नाम रहै गुणी, धामीमे विष्णी माईझूके । समय सापेक्ष विष्णी माईझूके वियाह भेलाके पश्चात किछु दिन वाद बाबु देवाई माईझूके देहान्त भया गेल । आब त परिवारमे विष्णी, विष्णीके परिवार (घरबाली), छोटे भाई किष्णी मात्र तीन जना बचल ।

जीवन निर्वाह करैबाला प्रमुख पेशा गाई, भैंसी पालन-पोषण और धामी, बैधके काम करैत समय दिन वित्या रहल छैलै । विष्णीके दिन चर्या विहान सवेरेमे गाई, भैंसी ल्याके बोन (जंगल) जेनाई, दिनभर चरैनाई, बोनके कन्द-मूल खेनाई और बचल किछु घर भि लावनाई । घरमे येते घरबाली गोबर गस्तर करैत सब काम काजमे द सहयोग करैत छैलै । एक दिन दुनु प्राणीके कोनो विषयमे साझँके मत-मतान्तर (झगडा) भया गेल । राइत वितल भोर भेल त औरो दिनके जेखा विष्णी गाई, भैस (मालजाल) खाइल्के बोन (जंगल) ज्या लागल्कि रैल्का खिस नै मारल रहै, घरबालीके मुहसे अचानक निकैल गेलै (जो तु बुरबा बोनमे आई बकाध भेटलै छौ) बस वहया दिनसे विष्णी माईझू घर नै ययाल । येते घरबाली अहरताके- पहरताके दिन, हप्ता, महिनौ, वर्ष वितला । दिव्य पुरुष विष्णी माईझू बोनमे अलप भयोगल ।

घरमे दियौर, भौजीके मनमे ना भाँती शंका-उपशंका उब्जे लागल कि कैलासे ठीक हैते .................... बहोत सोच-विचार केलाके बाद दियौर-भौजाइ निर्णय कैलक जे यै ठामसे सैर (छोड़ैर) के दोसर ठाम चल जेनाई ठीक हैते । यी ठोकवा त बिना प्रमाण अथवा पुराना दस्ताबेज के हम नै कैर सकब लेकिन सप्तरी जिल्लाके तरही गामके ईतिहासमे अखनतक वोई समाजके दोसरो जात-जातीके बुजुरुग लोक कहै छै कि यी तरहीमे खरही (खुटटा) गाारैबाला खानदान (रौताभागी) सब चियै । रौतासे भागके (छोड़रके) आवैबाला रौताभागी कहलावे लागल । यी ठाम चारकोसे झाड़ी छैलै, और झाड़ी सबके फाणी क्याके सबसे पहिले रौताभागी तरही गामके निर्माण कैलक । जग्गा-जमीन, खेतबारी अगल-बगलमे, जत्ते-तत्ते बहुतै बनेलक । सन्तान दर सन्तान बरलासे अलग-अलग बैठे लागल । एक ठाम से दोसर ठाम जाइके लेल बाटो (डगर) अपने जग्गा-जमिनमे एक से दोसर टोल जाइके लेल बनेलक जे वोई डगरके नाम (रौता डगर) कहैके अखनोतक तरहीमे अवस्थित छै । जग्गा-जमिन अत्यधिक भेलासे जिम्मदार सेहो कहावे लागल । समाजमे मान, प्रतिष्ठा बढलाके बाबजुद समाजके लोक सबके स्नान करैके लेल सातौ पुस्ताके सतनी माईझू पोखैर खोनेलक । पोखैरसे स्नान करैके दौरानमे कोई आदमी डुब्व गेलै त खुनी मुद्दा लागछटेलै, पोखैरवालाके वोई दिनमे । यै मुद्दा-मामिलासे बचैके लेल नवौं पुस्तामे आइबके हंसी माईझू + गेनी माईझू (काकादाजुभाई) के नाममे बिक्रम सम्वत १८७० मे पोखैरके (माहिरकागज) बनैलक हनुमाननगर कचहरीमे, तखन राजबिराजके जन्म नै भेल रहै । यै से साबित हैछै जे विगही के पोखैर बनाबै बाला निश्चित रुपमे धनि-मनी लोक रहै । पोखैर खुनाईसे लगभग सो, सवासौ वर्ष पहिले येल हेते । यी सैब समय (दिन) के यकिन कैलासे लगभग चार सय, सवाचार सय बर्षके ईतिहास तरही गामके देखाई छै ।